Neguko Bidaia

Neguko Bidaia

  • Urtarrilaren 18tik otsailaren 22ra
  • Areetako Andrés Isasi Musika Eskolako entzunaretoa
  • Ordua: 19.30
  • Sarrerak:
    - Saio baterako: 5 € (eskolako ikasleak: 3 €)
    - Abonamendua: 25 € (eskolako ikasleak: 15 €)

Neguko Bidaia zikloak musika estilo anitzak gerturatuko dizkigu, euskal eszenako artista eta taldeei protagonismo berezia eskainita. Ohi denez, saioak amaitu ondoren, artistek solasaldi interesgarritan parte hartuko dute.

Urtarrilak 18. Camerata Albia (Musika barrokoa)

Camerata Albia

Camerata Albia 2005ean fundatu zuen Mario Clavell Larrinagak, Euskadiko interprete entzutetsuak batu eta musika barrokoaren maisu handien musikan oinarritutako errepertorioa lantzeko asmoz: Bach, Telemann, Vivaldi, Händel...

Bere interpretazio estiloa XVIII. mendeko exekuzio arauekiko errespetuan oinarritzen da, zeintzuk gero eta ezagunagoak baitiren musikologiaren lanari esker. Dena den, etengabe berrasmatzeko beharra duen musika berri gisa tratatzen ditu eta gaur egungo espiritua kontuan hartzen du.

Sortu zenez geroztik, Camerata Albiak hainbat kontzertu eman ditu areto eta jaialdietan, eta lehenengoz egongo da Neguko Bidaia zikloan.

Mario Clavell Larrinaga Bilbon jaio zen. Goi mailako flauta ikasketak egin zituen Bilboko J.C. Arriaga Kontserbatorioan, Teodoro Martínez de Lecearekin eta Constantin Adamekin. 1990an amaitu zituen ikasketa horiek, bikain kalifikazioa eta Ohorezko Aipamena eskuratuta.
Hainbat ganbera taldetako kide izan da; esate baterako, EHUko Antzinako Musikaren Taldea, Bilboko Musika Barrokoaren Hirukotea, Quodlibet haize boskotea, Glamour, Concentus Sine Nomine, Synaulia Trio eta In Itinere (Santiago de Compostelako Unibertsitateko ganbera taldea).

Hainbat errezitaldi eman ditu bakarlari gisa, Anus Cividian eta Virginia Alijas piano-jotzaileek, Euskal Herriko Ganbera Orkestrak, Camerata Albia ganbera orkestrak eta abarrek lagunduta.

Bakarlari gisa edo taldetan, errezitaldiak eskaini izan ditu Europan, Asian eta Amerikan, Guanajuatoko Festival Cervantinon, Budapesteko Ferenc Liszt aretoan, Mexikoko Unibertsitate Nazionalean, New Yorkeko Metropolitan Museumen, Yale Unibertsitatean, Prado Museoan, Reina Sofía Arte Zentroan,  Donostiako Jazzaldian eta abar.

15 disko baino gehiago grabatu ditu, Erdi Aroko musikatik rock musikaraino doazen errepertorioekin.

Irakasle izan da Euskal Herriko Goi-mailako Musikene ikastegian. Gaur egun flauta eta inprobisazio irakaslea da Getxoko Andres Isasi Musika Eskolan, eta Gintonic rock sinfonikoko taldeko kidea ere bai.

  • Camerata Albia
    Mario Clavell Larrinaga, flauta
    Enrique Campos, biolina
    Javier Navascues, biolina
    Iraide Sarria, biola
    Gema López, biolontxeloa
    Ricardo de Lucas, kontrabaxua
    Guadalupe L. Castelo, klabizenbaloa

Urtarrilak 25. Iñaki Salvador (piano jazz)

Iñaki Salvador

Piano-jotzailea, konpositorea, moldatzailea. Piano, harmonia eta konposizio ikasketak egin zituen José Antonio Medina eta Jesús González Alonso piano-jotzaileen eta Francisco Escudero konpositorearen eskutik, besteak beste. Ia-ia autodidakta izan zen musika modernoari eta jazzari dagokienez, eta eskola magistralak eta orientazioa jaso zituen Richie Beirach, Lluis Vidal eta Jean-Luc Vallet bezalako nazioarteko artistengandik.

Espainiako jazz musikari nagusien kontzertu eta grabaketetan kolaboratu izan du: Perico Sambeat, Pedro Iturralde, Javier Colina, David Xirgu, David Gómez, Mario Rossy, Jorge Rossy, Raynald Colom, Mikel Andueza, Gonzalo Tejada, Joaquín Chacón, Ainara Ortega, Paula Bas eta beste asko.

Bere nazioarteko kolaborazioen zerrenda ere luzea da. Honako hauek osatzen dute, besteak beste: Allan Skidmore, Jean Toussaint, Jesse Davis, Charles Tolliver eta Alvin Queen. Kontzertuak eman izan ditu estatuko nahiz nazioarteko jaialdi garrantzitsuetan: Donostiako Jazzaldian, Gasteiz eta Getxoko jaialdietan, Madrilgo Nazioarteko Jazz Jaialdian, Baionan, Bucaresten (Errumania), Quiton eta Guayaquilen (Ecuador), Manizalesen (Kolonbia), Manchesterren (Erresuma Batua), Berlinen (Alemania) eta beste leku askotan. Gainera, New York hirian bakarkako piano kontzertua ere eman zuen.

15 disko editatu ditu bere formazioetako lider gisa, eta 100 baino gehiagotan agertu da denetariko talde eta bakarlarien kolaboratzaile gisa, askotariko estiloak landuz; musika klasikoa, rocka eta musika herrikoia, besteak beste. I. Tete Montoliú Saria bezalako aitorpenak jaso izan ditu. Sari hori estatu mailan sortu eta ematen da, piano-jotzaile kataluniar handiaren omenez. Bakarlari gisa sariak jaso izan ditu hainbat jaialditan, bai eta Televisión Española kateko Jazz entre amigos saioak ematen zuen saria ere. Musika konposatzen du zinemarako, antzerkirako, telebistarako eta dantzarako. Hala, Helena Pimenta, Josep María Mestres, Etelvino Vázquez, Fernando Bernués eta beste sortzaile batzuek zuzendutako obretarako musika konposatu du. Max sarietako finalista izan da birritan, eszenarako bere sorkuntza lanari esker. Mikel Laboa, Mikel Markez, Imanol, Javier Ruibal eta beste zenbait kantautoreren ohiko kolaboratzailea izan da eta da.

Euskal Herriko Goi-mailako Musika Ikastegiko Jazz departamentua martxan jarri zuen. Hain zuzen, gaur egun zentro horretako irakaslea da piano-jazz espezialitatean. Esperientzia zabala du jazzaren eta musika modernoaren esparruan, eta Bartzelonako Jazzaren eta Musika Modernoaren Ikastegian edota hiri bereko Taller de Musics bezalako eskola garrantzitsuetan aritu izan da irakasle lanetan. Zarauzko Nazioarteko Jazz Mintegia bezalako musika-ekitaldi garrantzitsuak zuzendu izan ditu. Jarduera horretan zuzendari pedagogiko eta musikal gisa aritu zen zazpi urtez.

Ana Pimenta aktore eta ekoizlearekin batera zuzentzen du Vaivén-Teatro y Música sorkuntza-egitura. 1998an sortu zen plataforma horren helburua da antzerki eta musika ikuskizunak sortu, ekoitzi eta zabaltzea.

Egitaraua

Bakarkako piano kontzertuan hiru ildo nagusi lantzen ditu Iñaki Salvadorrek: berak konposatutako lanak, euskal musika herrikoiaren gaineko moldaketa pertsonalak eta Jazz standard-en gaineko egokitzapen eta inprobisazioak.

Otsailak 1. Angéline Danel & Maron Desjacques (Sopranoa eta harpa - opera)

Maron DesjacquesAngéline Danel 

Harparen sokak eta sopranoarenak nahastu egiten dira eta opera errepertorioko maisulanen erritmoan dardara eginarazten digute. Bihotzetako heroien eta emozioz taupaka egiten duten ahotsen mundu batera garamatzate konpositore handien musikaren bidez.
Angéline Danelek eta Marion Desjacquesek, obra horiek interpretatzeaz gain, protagonisten benetako istorioa kontatzen dute elkarrizketa dinamiko eta bizi batekin, zeinetan ikusleak konplize eta protagonista bihurtzen baitiren.
Familia giroan bizi izateko magia eta aurkikuntza unea, opera-errepertorioko zenbait maisulan eskuragarri jartzen dituena helduentzat zein txikientzat.
Angéline Danel. Sopranoa
Angéline Danelek biolin-jotzaile gisa hasi zuen bere ibilbide musikala. Hortik gutxira erabaki zuen kantuan jardungo zuela, eta Lille, Paris, Marseilla eta Salzburgoko (Austria) kontserbatorioetan ikasi zuen.
Rol ugari interpretatu ditu Mozarten Don Giovanni eta Così fan tutte, Pucciniren La Bohéme, Bizeten Carmen, Verdiren Aida eta J. Straussen Fledermaus bezalako operetan. Accentus abesbatza frantziarrarekin (Théâtre du Châtelet, Opéra Bastille eta Pariseko Filarmonika) kolaboratu ohi du aldizka sorkuntza garaikideetan, bai eta grabaketetan eta nazioarteko biretan ere.
Bere ibilbidean zehar eszenarekiko, kantuarekiko eta pedagogiarekiko bere pasioa partekatu nahi izan du. Hala, kantu tailerrak animatu izan ditu eta ahotsarekin eta frantsesarekin lotutako coach gisa aritu izan da musika eta antzerki ikuskizunetan. Paraleloki, pertsonei estres uneak kudeatzen laguntzeko proiektu bat garatzen du.
Bilbon bizi da 2010. urteaz geroztik. Bada, Arriaga Antzokian, Elkarte Filarmonikoan, Campos Elíseos antzokian eta Euskalduna Jauregiko Musika-Músican abestu du.
Marion Desjacques. Harpa
1982. Urtean jaio zen Marion, eta bost urterekin hasi zen harpa jotzen Parisko IX. barrutiko kontserbatorioan. 1992an Parisko Goi-kontserbatorioan (CNR) onartu zuten, Brigitte Silvestreren ikasgelan, eta 1998. Urtean 1. Saria lortu zuen. Ondoren, zentro berean hobekuntzako bi urte egin zituen. 2000. urtean Parisko Musika eta Dantzaren Goi-kontserbatorio Nazionalean sartu zen, Isabelle Morettiren ikasgelan.
Ganbera musikako hainbat taldetako kide ere bada, eta kontzertuak eman ditu Parisen (Cortot aretoa, Sorbonako kapera) nahiz Frantzia osoan barrena.
2002an harpa duoan jo zuen Genevako (Suitza) Munduko Harpa Kongresuan, eta Normandiako Estudio Lirikoaren orkestrarekin (Philippe HUIk zuzendua) batera Baalbekeko (Libano) jaialdian, 2003an.
2004ko urtarrilean Juanjo Menak zuzendutako Bilboko Orkestra Sinfonikoko harpa-jotzaile bakarlari izendatu zuten.
2004an Parisko Musika eta Dantzaren Goi-kontserbatorio Nazionalaren MentionTB diploma eskuratu zuen, eta semifinalista izan zen urte bereko Nazioarteko Musika Torneoan.
2006an berriz, harpa irakasle diploma eskuratu zuen.
Marionek hainbat orkestratan kolaboratzen du (Coruña, Santiago de Compostela, Malaga, Paue-Bearno...).
Orkestrako harpa-jotzaile bakarlari gisa duen jardueraz gain, Marionek ganberako musikarekin jarraitzen du, eta oso interesgarriak dira harparekin egin ditzakeen moldaketak.

Otsailak 8. Los parranderos de México (Mariachi)

Los parranderos de México
SARRERAK AGORTUTA
Mariatxi soinuarekin mundua abesten hasten da!
Mexikoko musika tradizionala egiten duen talde hau Mexikoko Errepublikako hainbat tokitatik etorritako musikariek osatzen dute, eta lehenengoz arituko da Bizkaian.
Mariatxi honen esperientzia handien artean, Amerika eta Europako hainbat hiritan aritzea eta jende famatuarentzat kantatzea daude.
Konpositore eta interprete handi hauen lanek osatzen dute beren errepertorioa: José Alfredo Jiménez. Rubén Fuentes, Cuco  Sánchez,  Juán Gabriel, Vicente Fernández, Pedro Infante eta Jorge Negrete, besteak beste. Horien lanak joko dituzte Los Parranderos de Méxicokoek.
Ziur gaude ikusleek berriz abestuko dutela Cielito lindo, México lindo edota Volver Volver.
Nabarmendu behar da Mexikoko musika tradizionala Gizateriaren Kultura Ondare Immaterial gisa aitortu zuela UNESCOk 2011an. Bada, horrek harrotasunez betetzen gaitu munduan horren onartua den musika mexikarra zabaltzen lan egiten dugun guztioi. Hain zuzen, horregatik maite du horrenbeste munduak Mexiko.
Ziur gaude guztion laguntzaz ekitaldi hau kontzertu handi bat izango dela.
Mariatxi soinuarekin mundua abesten hasten da!

Otsailak 15. El pacto (Rock)

El pacto

El Pacto 2012ko martxoan hasi zen sortzen, Castro Urdiales eta Bizkaia artean. Mario Marrodán (ahotsa) eta Juan Carlos Gómez  (bateria) dira fundatzaileetako bi. Fernando Florido (baxua), Alberto Eguía (teklatuak), Juan Carlos Ares (gitarra) eta Iñaki Galarza (gitarra) batu ostean, agertokietan jotzen hasi ziren. Beranduago Lisbeth López (ahotsa) eta Juan Carlos Ares ordezten duen Ramon Escobar (gitarra) batu zitzaien. 70eko, 80ko eta 90eko hamarkadetako rock musikaren klasikoek osatzen dute errepertorioa.
Tartean behin, eta bere konpromisoek ahalbidetzen diotenean, Fito y Fitipaldis taldeko saxo-jotzailea den Javi Alzolaren laguntza izaten du taldeak. Gaur egun honako hauek osatzen dute taldea:

Mario Marrodán (ahotsa)
Juan Carlos Gómez (bateria)
Alberto Eguía (teklatuak)
Ramon Escobar (gitarra)
Gontzal Alonso (baxua)

Otsailak 22. Halír Trío (biolina, txeloa eta pianoa)

Halír Trío

Halír Trio 2016an jaio zen, Karel Halír (Vrchlabí 1859- Berlin 1909) biolin-jotzaile txekiar birtuosoa ezagutzera emateko xedez.
Halír Trioko kideek hainbat nazioarteko lehiaketa irabazi dituzte: Kontserbatorio Eslovakiarretako Ikasleen Lehiaketa, Hannoverreko Karl-Bergemann Lehiaketa, Dublingo Musikaren Europar Saria lehiaketa, eta abar. 
Taldeak hainbat jaialditan parte hartu izan du: Gaztela-Mantxakoan, Mahóneko Musikari Gazteenean, Kordobako Ganbera Musika Zikloan, Tarragonako Metropole Antzokian, Lleidako Enrique Granados Auditoriumean eta Txekiar Errepublikako, Alemaniako eta Italiako hainbat hiritan, besteak beste.
2017ko udan, Halír Triok bere lehenengo Granados – Dvorák CDa grabatu zuen Lleidako Enrique Granados Auditoriumean, Arcodiva diskoetxe txekiarrarekin eta Naxos zigiluaren banaketarekin.
Halír Trioren hurrengo proiektu diskografikoa, hori ere Arcodiva eta Naxosekin, Paul Juonen Trio la menorren op. 17 izango da, Halírrek 1902an estreinatua, eta Tchaikovskyren Trio la menorren op. 50, Halírrek 1888ko urtarrilean Leipzigen interpretatua konpositorea bertan zela. Azken horrek bere egunerokoan baieztatu zuen musikariek zoragarri jardun zutela.
Bakarlari garrantzitsu askok eman izan dituzte kontzertuak Halír Triorekin batera: Bennewitz laukoteko lehenengo biolina den Jakub Fišer, Txekiar Filarmonikako klarinete-jotzaile Jan Brabec, Baleareetako Orkestrako klarinete-jotzaile Juan José Pardo, Orbis Trioko piano-jotzaile Stanislav Gallin, Sinaloako (Mexiko) Orkestrako biola-jotzaile Ester García, Meridako (Mexiko) Orkestrako biola-jotzaile Jaroslav Meluzin, Extremadurako Orkestrako eta Lisboako Gulbenkian Orchestrako txelo-jotzaile Jaime Puerta...
Halír Trioren hurrengo kontzertuak Munichen, Pragan eta Espainiako hainbat elkarte filarmonikotan izango dira, Malagan, Lugon, Vigon eta Zamoran kasu. Halírrek eta Berlingo bere Trioak emandako kontzertuak omentzeko asmoz, emanaldiak egin zituzten 1904an Bilboko eta Madrilgo elkarte filarmonikoetan, hain zuzen Tchaikovskyren Trioa interpretatuz.

 

Eduardo García Salas, biolina
Jana Podolská, txeloa
Václav Mácha, pianoa

Esta web utiliza cookies, puedes ver nuestra política de cookies, aquí Si continuas navegando estás aceptándola
Política de cookies +