2026/4/6
Maider Aresti eta Naroa Azpitarte Ingalaterrako 21 urtez azpikoen aurkako porrotean aritu ziren
Getxo RTko jokalariek, Maider Arestik eta Naroa Azpitartek, nazioarteko beste partidu bat jokatu zuten joan den larunbatean. Ingalaterrako 21 urtez azpiko selekzioaren aurka izan zen neurketa, Villajoyosako (Alacant) El Pantano zelaian. Partida Espainiaren 17-27ko porrotarekin amaitu zen.
Getxotarra den Maider Aresti hasieratik aritu zen, erdiko postuan; aldiz, durangarra den Naroa Azpitarte aulkitik irten zen eta partidako azken entsegua egin zuen, amaierarako hamar minutu falta zirela, markagailua itxiz.
Ingalaterra askoz nagusiagoa izan zen, batez ere lehen zatian; indartsu hasi zen eta une oro aurkariaren entsegu-lerroa bilatu zuen, Espainiaren defentsako lan onari aurre eginez. Lehen zatia 0-17ko emaitzarekin amaitu zen. Bigarren zatian, etxeko taldeak hiru entsegu lortu zituen eta horri esker aurkariak baino puntu gehiago egin zituen zati horretan, 17-10eko partzialarekin.