Getxo - Udala - Udal Antolaketa - Getxo udaleko alderdi politikoen iritziak eta proposamenak

Hasiera

Udala

Udal Antolaketa

Getxo udaleko alderdi politikoen iritziak eta proposamenak

2022eko Urtarrilak 20

EAJ - PNV

EAJ/PNV: 2022, kultura-erreferente

Getxo Euskadiko kulturaren erreferente den herria eta udalerria delako, programazioari nahiz sormenari dagokienez. Eta hain zuzen ere kulturako abangoardian jarraitze aldera, Getxok goi-mailako espazio eta ekipamenduak ditu, zeinak baloraziorik altuena jasotzen baitabiltza kultura eta arte eszenikoen sormen nahiz ekoizpenaren alorrean. Aipatzekoa da Romo Kultur Etxea, espazio horretan egiten diren ekimenengatik, eta lantzen ari den eguneraketa teknologikoarekin gauzatu ahalko direnengatik, hala nola pop edo rock estiloetako talde getxoztarren entseguak eta grabazioak. Bai eta erakusketa-aretoan egiten ari diren hobekuntzak ere, arte bisualen aldeko apustua egitea ahalbidetuko dutenak. Halaber, zalantza barik nabarmentzekoa da Romo Kultur Etxeak ostegunero eskaintzen duen kalitate handiko kontzertu-zikloa, BAKARKA izenekoa.

Eta, noski, Muxikebarri kultur etxea aipatu behar dugu; izan ere, 2022. urtean espero dugu zinema, antzerki, musika, dantza eta, oro har, arte eszenikoen jarduera ugari eskaintzea bertan, bai tokiko sormenekoak —Getxoko sortzaileek eginak, alegia—, bai haren areto paregabeetara heltzen diren lan bikainak. Jakin berri dugu ekimen berezia egingo dela, Getxoko elkarteek Muxikebarriko programazioan parte hartu dezaten, eta 60.000 euroko aurrekontua eskainiko da horretarako.

COVID-19 gaitzak eragindako pandemia oztopoa izango da berriz ere, eta, azken urte eta erdian gertatu den bezalaxe, Getxoko Kultur Etxeak modu paregabean kudeatuko du egoera. Horrenbestez, hein handiagoan ala txikiagoan, Euskadiko goi-mailako eskaintza kulturalaz gozatu ahalko dugu.

2022ko lehen lauhilekoaren Getxoko programazio kulturala aniztasuna eta kalitatea oinarri hartuta eskaini da. Gauzak horrela, Kultura eta Getxo binomioan planteatzen den askotariko kultur jarduerak, berritzailea eta tradizioan edo abangoardian erreferentziazkoa denak, bideari eutsi ahalko dio. Amaia Aguirre alkateak adierazi duenaren arabera, binomio horrek erreferente bihurtzen gaitu, iazko balantzean, pandemia egon arren, ia hirurehun kultur ekitaldi eskaini baitziren Muxikebarrin, zeinetan ia 36.000 ikus-entzule egon baitziren. Datuak edozein usteri gailentzen zaizkio. EAJ-PNV alderdiak hartutako konpromisoa betetzen du, Getxo emozioen eta sormeneko abangoardiaren antzeztoki izan dadin; Getxo, hiri zoragarri eta ilusio handien iturri.

PP

Abasota kalearen berrantolaketa

Gobernu-taldearen politikaren anabasa eta zentzugabekeria gure kaleetan ere islatzen da jada. Horren erakusgarri dugu Algortako Abasota kalea. Kale horren hasieran, espaloien eta espaloirik gabeko guneen lerrokadura ulertezina da irrazionaltasunagatik eta logika-faltagatik. Lehenik, espaloia duen tarte bat dago; ondoren, espaloirik gabeko tartea; azkenik, ulertezina dirudien zabalera duen espaloi-tartea, gutxienez bost edo sei aparkaleku-plaza kentzen dituena. Logikoena izango litzateke bi tarteak lotzen dituen espaloia egitea, 6 zenbakiaren aurrean dagoena txikitzea udalerriko tamaina estandarrekoa izan dadin, eta horrela lortutako espazioa aparkaleku-plazetarako egokitzea, oso beharrezkoak baitira. #esnatuGetxo

EH Bildu

Osasungintza publikoa, aurrera!

Egoera kritikoan dago gure osasun sistema publikoa. Osasun langileak lehertzear daude, lan orduak eta lan karga biderkatu zaizkiela ikusten ari gara eta horrek herritar guztioi eragiten digu. Euskal herritar bezala gure eskubidea da kalitatezko osasun publikoa bermatua izatea eta eskubide hori urratzen ari dira: itxaron zerrenda amaigabeak, ebakuntza eta tratamenduen atzerapena, aurrez aurreko hitzorduen deuseztapena… Eta hau guztia EAJ-PSEren gobernua ez delako gai izan seigarren olatuari aurrea hartzeko eta neurri zentzudunak ezartzeko. Covid pasaportea ezarri ziguten bitartean 4.000 aztertzaile kaleratu zituzten.

Komunitate zientifikoaren irizpide eta gomendioak kontuan hartuta, seigarren olatu hau gainditzen laguntzeko guk bost proposamen ditugu: antigeno eta diagnostikorako testak unibertsalizatu eta farmazietatik haratagoko tokietan eskaini, doakoak edo prezio sinbolikoarekin; aztarnari ekipoak indartu, areagotu eta denboran mantendu, eta hauen lanerako protokolo eta prozedurak aldatu kutsadurak eteteko; airearen kalitate ona mantentzeko neurriak jarri: CO2 neurgailuak eta airea garbitzeko filtroak; kontziliazio neurrietan lagundu eta zaintza lanetarako bideak irekiko dituzten politikak aurrera eraman; eta azkenik, txertoa osasun etxeetatik atera kontsulta presentzialak berreskuratzeko, erizain eta medikuek dagokien lana egin dezaten.

PSE-EE / PSOE

Hezkuntza globalaren eta irisgarriaren aldeko apustua egiten dugu

Getxoko alderdi sozialistak ume getxoztar guztientzat irisgarria den hezkuntza globala eskaintzearen aldekoa da. Horrenbestez, Gizarte Kohesioko Arloak hezkuntzako gastu orokorretarako 863 laguntza baino gehiago eman ditu 2021-2022 ikasturterako, guztira 115.625 euro zehazki. Hala, familia bakoitzak 134 euro jasoko ditu batez bestean. Izan ere, prestakuntza gure gizartearen zutabe nagusietako bat da, bai eta Udal Talde Sozialistaren lehentasunetako bat ere.

Garai zail hauetan, koalizioko gobernuaren helburua da bermatzea inor atzean geratzen ez dela eta ikasle guztiek kalitatezko prestakuntza dutela eskuragarri modu irisgarrian. Baliabide ekonomikorik ez izatea ez da inoiz oztopoa izango gure udalerrian hezkuntzarako sarbidea izateko, udal honek berdintasunaren alde egin dezakeen ekintzarik handiena prestakuntzan inbertitzea eta guztion sarbidea bermatzea baita. Getxoko Udalak lehenengo egunetik lehenetsi du bai pertsonen oinarrizko beharrizanak asetzea, bai haiei zerbitzuak eskaintzea; hori guztia, bereziki egoera ekonomiko zailetan dauden pertsonengan arreta jarriz.

Elkarrekin Podemos - Ezker Anitza - EQUO Berdeak

HAPO berrirako dituzun proposamenak entzun nahi ditugu

Azkenik, HAPO berria errealitate izango da laster. HAPOa egiteko negoziazio-prozesua abian da jada, aukera paregabea gure udalerriko hirigintza-plana gizarte-babeseko etxebizitzen beharrizanetara egokitu dadin, gazteen alokairu eskuragarria bultzatu dezan, etxebizitza-eredu berriak proposatu ditzan, klima-aldaketari eta oso beharrezkoa den ingurumenaren babesari egokitu dadin eta urbanizazioa areagotu ez dezan. Udal-taldeetako kideok gobernu-taldearekin hizketan hasiko gara laster; hortaz, zure iritziak eta proposamenak helaraztera animatzen zaitugu, plan berriak Getxoko herritarren benetako beharrizanei erantzun diezaien. Jar zaitez gurekin harremanetan helbide elektroniko honetara idatziz: elkarrekinpodemos@getxo.eus