Getxo udaleko alderdi politikoen iritziak eta proposamenak

2019ko Maiatzak 16

EAJ - PNV

EAJ-PNV

Eskerrik asko Getxoko elkarteen sareari

Mila esker, asko zarete eta Getxoko elkarteen sare zabala osatzen duzuenak eta esfortzua, lana, konpromisoa eta zintzotasuna eskaintzen duzuenak askotariko egoera pertsonal konplexuak hobetzeko, gure herrian ere badaude horrelakoak eta.

Berehala hasiko dira ikasturte bukaerako zenbait topaketa eta jarduera. Horietan, hainbat erakunde, elkarte eta GKEk urte osoan egiten duten lana erakusten dute, ia atsedenik gabe eta kideen lan boluntarioarekin eta pertseberantziarekin aurrera eramaten dutena, hain zuzen ere. Erakunde asko dira, eta ezinezkoa da guztiak izendatzea. Hala ere, beren lan ordainezina neurri batean eskertzeko asmoz, Sortarazi edo Portuko Mojak izenez ezagunak direnak nabarmendu ditzakegu. Horiek egunero eskaintzen dute beren denbora une gogorrak bizitzen ari direnei edo gizarte bazterkeria egoeran sar daitezkeen pertsonei laguntzeko. Modu horretan, beren bizitza hobetzeko babesa eta laguntza ematen diete, Getxon inor ez dadin atzean geratu. Gizarte-arretako beste eremu batean lan egiten duten beste GKE batzuek ere helburu bera daukate; esate baterako, Zabalketak edo Perualdek. Noski, herritar guztien partez zorionak emateko moduko lana da Getxoko auzoetako elkarte eta eragileek egiten dutena adinekoen zahartze aktiboa eta bizi-kalitatea hobetzeko; edo berdintasunaren arloan lan egiten duten boluntarioen erakundeena, egunez egun esfortzua egiten dutelako Getxon ere emakumeen eta gizonen arteko benetako berdintasuna erdiesteko.

Eskerrik asko eta zorionak norbere denbora, gogoa eta lan hori eskaintzen duten guztiei, boluntarioki eta isilean, babesa behar duten beste pertsona batzuekin une onak partekatzeko. Eskerrik asko Getxoko elkarteen sareari; izan ere, inguruan erreferentea izan da eta hala izaten jarraitzen du, balio kalkulaezina duen kolektibo bat izateaz gain.

PP

PP

Esnatu Getxo

Aldaketarako beste aukera bat dator. Gure udalerriak aldaketa hori behar du esnatzeko, EAJk lozorroan utzi du eta. Alderdi Popularrarekin soilik lor daiteke aldaketa hori.

Langileez, kaleko jendeaz eta gure hautagai Eduardo Andradek bezalako irabazle espiritua duten pertsonez osatutako talde batekin aurkeztuko gara hauteskunde hauetara. PP berriz ere merezi duen tokira eramateko aurrerapausoa eman duten pertsonak gara, familiaren aldeko apustuarekin, merkataritza bultzatzen duten eta aparkaleku gehiago eskaintzen duen proiektu batekin eta pertsona zein maskotentzako bizi-kalitate hobearekin. #EsnatuGetxo

GUK Getxo

Eskerrik asko zuen babesagatik!

Azken Getxoberri honen bidez, behar bezala esan nahi dizuegu agur. Izan ere, 2015ean hautesle-elkarte gisa aurkeztu zen GUK Getxo EZ DA ITZULIKO HAUTETSONTZIETARA. Legegintzaldiko lau urte hauetan jardun oso intentsua izan dugu hasiera-hasieratik. Bada, oso pozik gaude orain amaitzear dagoen aro honetan egindako lanagatik. Guztira 83 mozio aurkeztu ditugu, herritarrekin, gure batzarretan, lantaldeetan eta Getxoko elkarte eta kolektiboekin batera landutakoak. Pozik gaude, era berean, Getxoko Udaleko osoko bilkurara euren ahotsa eramateko asmoz eskaerak helarazi dizkiguten guztiekin. Ekimen horietako asko onetsi egin dira; gehienak, hain zuzen! Gainera, gobernu taldea hainbat bider lotsaraztea lortu dugu, beren zorroztasun falta egiaztatu eta udalerria kudeatzeko gabeziak agerian jarri ahal izan ditugu eta. Egia esan, deserosoak izan gara haientzat. Horrenbestez, aro hau sentsazio onarekin itxiko dugu, eta urte hauetan zehar emandako babesa eskertu nahi diegu pertsona eta elkarte guztiei. Jo eta ke ibili gara lanean eta gutxien entzuten zaien horiek defendatzen. Horrez gain, harrotasunez esan dezakegu kode etikoa bete dugula eta horri esker udalak 360.000 euro aurreztu ahal izan dituela eta 50.000 euro baino gehiago eman ahal izan dizkiela kolektibo sozialei. Amaitzeko, gogorarazi nahi dizuegu oso garrantzitsua dela botoa ematea, betikoek agintzen jarrai ez dezaten. Izan ere, EAJren 40 urteren ostean, Getxok aldaketa behar du! Kaleetan ikusiko dugu elkar!

EH Bildu

Getxo hobetzeko konpromiso eta ilusioarekin

Legegintzaldiko azken Getxoberri honetan, eskerrak eman nahi dizkizuegu lau urte hauetan gurekin batera elkarlanean aritu zareten guztioi. Zuen iritzi, kexa eta ekarpenak helarazi dizkiguzuenoi. Gure auzoak hobetzeko asmoz, proposamenak egin dituzuen guztioi. EH Bilduk antolatutako bilera eta ekitaldietan parte hartu duzuenoi. Lau urte hauetan, udaletxean hamaika ekimen eraman ditugu aurrera: akordio garrantzitsuak lortu ditugu, eta, aldi berean, oposizio eraikitzaile eta irmoa egin diogu udal gobernuari. 

Udaletxetik kanpo ere, lau urte hauek oso biziak izan dira. Kalean hamaika aldarrikapen eta borroka eredugarri izan ditugu: Romok Nagusien Etxearen alde egin duen defentsa, Tosu eta Andra Mari interes espekulatiboetatik babesteko borroka... Mugimendu feministak ere kaleak bereganatu ditu eraso matxista eta heteropatriarkatuari hortzak erakusteko. Eta Euskaraldia bezalako ekimenei esker, ilusioa piztu da euskaltzaleon artean, euskaldunak aktibatu eta zubiak eraikitzeko euskaraz ikasten ari diren getxoztarrekin. Ahaztu barik, auzokide bakoitzak bere auzoan aurrera eraman dituen borroka txikiak, bere kalea hobetzeko asmoz. 

Lau urte hauek oso biziak izan dira, eta datorren legegintzaldia ere are biziagoa izatea espero dugu, bai udaletxean, eta baita kalean ere. EH Bilduk bietan lanean jarraituko du: udal garden eta parte-hartzailea izango duen Getxo feminista, euskaldun, berde eta aktiboa eraikitzen. Eskerrik asko!

PSE-EE / PSOE

Agurra eta esker ona

Lerro hauek irakurtzen dituzunerako, jada beste hauteskunde kanpaina batean murgilduta egongo gara, eta oraingo legegintzaldia amaitzear egongo da. Agur esateko eta esker ona adierazteko garaia da. Agur esango diegu alderdi sozialistak izan dituen bi zinegotziei, horietako bat ere ez delako egongo hurrengo legegintzaldian. Eta eskerrak eman behar dizkiegu PSE-EErengan (PSOE) konfiantza izan zuten getxotarrei. Legegintzaldi honetan zehar praktikan jarri nahi izan ditugu gure hauteskunde programan sartu genituen proposamenak; oraingoan, udal gobernutik. Gure funtsezko helburua izan da batutako Getxo bat lortzea, eta desparekotasunik gabeko gizarte justu baten aldeko apustua egin dugu, non guztiok izango ditugun pertsona gisa garatzeko beharrezko baldintza eta baliabide guztiak. Herritar guztiek, eta batez ere gazteek, praktikan jarri ahal izan ditzaten beren nahiak edo bizi-proiektuak. Herritarrek komenigarritzat jotzen duten moduan baloratuko dute egindako kudeaketa, eta sozialistok inspiratzen gaituzten eta gure izateko arrazoia justifikatzen duten balioak defendatzen jarraituko dugu.

Cs

Ciudadanos

Gero arte

Zutabe hau idazten duen eskua Ciudadanos Getxo udal taldearena da, baina erredaktatu duena ni naiz, taldeko zinegotzia, Santiago Sainz. Zuei, Getxori, jakinarazten dizuet ez naizela egongo hurrengo udal hauteskundeetan. Bihotzez diot niretzat ohorea izan dela zuek ordezkatzea, zuei entzutea eta, nola ez, laguntzea. Neurria eman izana espero dut. Eskerrik asko guztiagatik. @Sainz_Robles.

Hemeroteka

Esta web utiliza cookies, puedes ver nuestra política de cookies, aquí Si continuas navegando estás aceptándola
Política de cookies +