2026/6/1
Ingurumena babestu eta zaintzeko asmoz, Udalak, ekainaren 15etik aurrera, Itxas Argia-k Nazioarteko Paella Lehiaketa antolatzen duen esparruaren bazterrean dagoen espazioaren zati bat balizatuko du, aurtengo urtetik aurrera erabilera mugatua izango duena. Getxoko Hiri Antolamenduko Plan Orokor (HAPO) berriak Ingurumen Hobekuntza gisa mugatzen du eremu hori zaintzeko eta birsortzeko, ingurumenaren aldetik interes berezia duelako Kostaldeko Txilardi lehor atlantikoen Lehentasunezko Interes komunitarioko Habita (Erika vagans) gisa eta, beraz, Udaltzaingoak balizatu eta zainduko du.
Eremu horren zati bat da (2,4 hektarea), Europar Batasuneko Habitatei buruzko Zuzentarauak aktibo natural gisa definitzen baitu eta hura babestera behartzen baitu. Udalak horrela zainduko du, azken urteetan pinudiarekin egin duen bezala, Aixerrotako zelaietara joaten diren pertsonek gero eta errespetu handiagoa baitiote. “Getxon hain errotuta dagoen jai baten gozamena ingurunearekiko eta ingurumenarekiko errespetuarekin uztartu behar dugu. Bereziki eremu hauskorra da, zaindu eta babestu beharrekoa. Zeregin horretan inplikatu behar dugu, eta erakundeek eta herritarrek elkarrekin topo egin, ospakizun horretaz modu jasangarriagoan gozatzen jarraitu ahal izan dezagun”, adierazi du Amaia Aguirre alkateak.
Egoera hori gaur bertan jakinarazi zaie inguruko bizilagunei, baita esparru ofizialaren ondoko festan parte hartzen duten koadrilei ere. Getxo Kulturak, udalarekin lankidetzan, bitartekaritza lana egiten du koadrila horiekin, segurtasuna handitzeko, arriskuak minimizatzeko eta ingurumenarekiko errespetua eta garbiketa sustatzeko.
Eremu horretarako sarbidea murriztearen ondorioz, egiaztatutako mugikortasun murriztua duten pertsonentzat gordetako aparkalekua metro batzuk lekualdatu beharko da, eta behar bezala seinaleztatuta egongo da. Neurriak eragindako espazioa balizatzeaz gain, informazio-kartelak jarriko dira, hondakinak gaika biltzeko egokitutako puntuak, ebakuazio-bideak, suteen aurkako babes-bitartekoak, indarkeria matxistako auziak artatzeko puntu moreko kokapena, anbulantzia, iturriak eta abar seinaleztatuz.
Duela urte batzuk udaleko hainbat sailek hartutako neurriak, lehiaketaren eragina murrizteko eta segurtasunaren, ingurumenarekiko errespetuaren eta garbitasunaren inguruan kontzientziatzeko, mantendu egingo dira eta behar bezala iragarriko dira.