2026/1/9
Getxo Kirolakek Kirol Metodologi LAB (KML) aurkeztu du. Kirol metodologiak berritzeko laborategia da Kimet Sport enpresak garatua, eta, Eusko Jaurlaritzarekin lankidetzan, Fadurako erabilera anitzeko eraikin berria den Tiki Toki Zentroaren bigarren solairuan hasi da lanean. Laborategiaren lantaldea teknologian, kirolean, komunikazioan, osasunean, marketinean eta prestakuntzan adituak diren pertsonek osatzen dute, beste jakintza-arlo batzuen artean, eta dagoeneko Getxoko hainbat klubekin lankidetzan ari da kirol errendimendua optimizatzen lagun diezaieketen metodologiak diseinatzen. Metodologia-tresnak garatzeaz gain, laborategi berri honen beste helburu batzuk kirol-erakundeetako teknikariei eta kudeaketa-langileei prestakuntza ematea, eta praktika eta ekitaldiak sustatzea dira.
Aurkezpenean, atzo arratsaldean Faduran udalerriko kirol eta elkarte sarearen aurrean ospatu zena, Getxoko alkate Amaia Agirrek azaldu zuen: “Kirol Metodologi LAB-ekin, kirol getxotarra kirol kudeaketaren abangoardian kokatzen da, gure klubak indartuz eta egungo eta etorkizuneko erronkei aurre egiten lagunduz. Gainera, laborategi horren presentziarekin, Fadurako Tiki Tokik kirolaren gune dinamizatzaile eta topagune gisa duen zeregina indartzen du, eta gaur egun gure kirolaren birika gisa sendotzen da”.
Bestalde, KML-ko arduradun nagusi Gari Fullaondok gogorarazi zuenez, “Kirol Metodologi LABek kirolean metodologia propioa garatu nahi duen munduko edozein kirol erakunderen ‘Google' izan nahi du, baita udalerriko kirol erakunde guztiek kudeaketa metodologikoa mundu mailan arrakastatsua eta erreferentea izateko topagunea ere, gure gizarte masaren kirol errendimendua eta ongizatea hobetzea lortzen dugun bitartean”.
Kirol Metodologi LAB udalerriko kirol kudeaketan eta jarduera ekonomikoan eragin positiboa izateko bokazio nabarmenarekin sortu da. Hori dela eta, datozen hilabeteetan laborategiko talde arduraduna proiektua eta eskaintzen dituen zerbitzuak ezagutarazten hasiko da estatuko eta nazioarteko foroetan, non esperientzia handia duen 20 herrialde baino gehiagotan 50 erakunde baino gehiagorekin egindako lanekin eskarmentu zabala duen.