EZAGUTU GETXO
Pintxoen ibilbideak
Pintxoen ibilbideak
Pintxotan joatea Getxon
Getxon pintxoak ez dira jateagatik jaten, erritual soziala eta gutxienez behin bizi beharreko euskal ohitura da. Ardoak edo "txikitoak” laguntzeko sortu ziren arren, miniaturazko goi-mailako sukaldaritza bihurtu dira pintxoak.
Tapa delakoak ez bezala, euskal pintxoak konplexuagoak izan ohi dira. Jatorriz, txotxez eusten ziren ogi-xerra baten gainean, eta hortik datorkie izena.
Barra erakusleihoa da: sartzean, askotariko pintxoak dituzten platerez josita ikusiko dituzu barrak. Pintxo hotzak zuzenean aukeratu ahalko dituzu barran, eta gehienetan arbeletan adierazten da eskaintzen diren pintxo beroak, unean bertan prestatzen baitira.
Konfiantza-kontua da: normalean, bezeroek amaitzean adierazten dute zenbat pintxo jan dituzten, kontua ordaintzeko.
Ordutegiak: jan aurretik (hamaiketako) edo afaldu aurretik jan ohi dira; hala ere, hirietan, hala nola Getxon, Bilbon eta Donostian, otordu nagusia izan daitezke, pintxo-taberna ugari baitaude.
Pintxo izena Donostian sortu zen, eta pixkanaka-pixkanaka lurralde osotik zabaldu da; izan ere, hasieran banderilla esaten zitzaien Bilbon eta inguruetan
Ziur asko pintxorik ezagunena gilda da, zeinaren osagai klasikoak oliba berdeak, antxoa gazituak eta piperminak (ozpinetan egindako piperrak) zotz batean sartuta dauden. Diotenaren arabera, Rita Hayworth protagonista duen Gilda filmetik (1946) datorkio izena, berdea, gatzduna eta garratza delako.
Bilbon eta inguruetan, pintxo batzuk ditugu betidanik:
Bilbainito: hiriko banderilla nagusia. Arrautza gogorrez, otarrainxkaz eta maionesaz egiten da, eta batzuetan arrautza-gorringoaz hautseztatzen da.
Kilkerra: pintxo umila baina ikonikoa da; patata egosiaz, tipula zuriaz eta letxugaz egiten da, eta olio eta gatzarekin ontzen da. Bilboko pintxorik tradizionalenaren funtsa da
Non jan pintxoak Getxon?
Bertako tabernak zeharkatuz Getxotik ibili ahal izateko, auzo historikoetan banatu dugu udalerria, horietako bakoitzak giro desberdina eskaintzen baitu, betiere nortasun propioari eutsiz. Esperientziarekin bat egin ezazu eta dastatu itzazu miniaturazko sukaldaritzaren gutiziak.
Badakigu ez ditugula barra nagusi asko aipatu, hain da zabala gure ostalaritza! Hasierako iradokizuntzat jo itzazu ibilbide hauek, onena baita edozein auzotik galtzea eta halaxe ezagutzea aipatu ez ditugun altxorrak.
Algorta
Algorta, auzorik handiena izateaz gain, udalerriko bizitza sozialaren epizentroa ere bada. Bertako aniztasunari esker, oso giro desberdineko ibilbideak aurki daitezke: Portu Zaharreko giro bohemioa, zein Telletxe inguruko merkataritza-iskanbila. Leku ezin hobea da jatorrizko “euskal tapeoan” murgildu eta aniztasuna bilatzen dutenentzat.
Areeta/Las Arenas
Areetako pintxoen ibilbidea erosoa eta sofistikatua da, eta urrats gutxitan lotzen ditu mugarri historikoak eta gastronomiarik onena. Dastatu mokadu bat itsasadarraren eta Bizkaia Zubia izugarriaren bistaz gozatu bitartean, eta gerturatu ondoren Kale Nagusiko eta Eskoletako plazako bizitasunera. Aurkitu oreka perfektua: Egin turismo kulturala eta gozatu gastronomiaz aldi berean.
Romo
Ohiko ibilbide turistikoetatik aldentzen den esperientzia nahiago baduzu, gerturatu zaitez Romora. Auzoak berezko nortasuna du, soiltasunean dotorea da, eta tradizioari eusten dioten barrak daude bertan. Inguru paregabea da poteoa lasaitasunez eta bertako jendeaz inguratuta egiteko. Gainera, bertako pintxoetan produktuen kalitatea da protagonista.
Neguri
Neguriko pintxo-ibilbidea Makaleta aldea geltokiaren inguruarekin lotzen duen ardatzean dago. Ibilbide hori da aproposena jende-pilaketak saihestu nahi dituztenentzat. Auzo-izaera eta esklusibotasunagatik nabarmentzen da, non topaketa lasaiak egitera bultzatzen den. Negurin mokadu eta elkarrizketa bakoitzaz presarik gabe gozatzen da.
Ikus dezakezunez, Getxon pintxotan joatea jate hutsetik haratago doa, pintxo bakoitzean gure historia dastatuko baituzu. Ibilbide horiek zure erritmora moldatu dezakezun bidaia gastronomiko baten abiapuntua baino ez dira; Getxoko barra bakoitzak miniaturazko sukaldaritzaren proposamen paregabea du. Dasta itzazu! Etorri gosez, aukeratu lehen auzoa, eta goza ezazu benetako pintxoen kulturaz.
