Paellen jaia 1956ko uztailaren 25ean ospatu zen lehenengoz, hiru lagun minek, Damián Ayok, Antonio Bilbaok eta Félix Yurrebasok, sustatu zutenean urte gutxira izen honekin ezagutu zena: Getxoko Paella Txapelketa.

Egun, Itxas Argia elkartea arduratzen da ekitaldi ospetsu horren antolaketaz. Aurten, 62. urte beteko ditu ospakizunak.

Denborak aurrera egin ahala, ospakizuna gero eta ospetsuagoa bihurtu da eta Getxotarrek gustukoen duten ekitaldietako bat da. Urtero, milaka pertsona Aixerrotako zelaietara bertaratzen dira paella jatera eta eguna modu ezin hobean pasatzera. Izan ere, beste herrialde batzuetatik etorritako taldeek nazioartekoa bihurtu dute txapelketa: belgikarrek, amerikarrek, australiarrek, japoniarrek eta beste hainbatek.