Prentsa-oharra

GetxoExpress film laburren jaialdiak bosgarren edizioa ospatuko du eta 2.600€ baino gehiago banatuko ditu saritan

2020/10/09

Ereagan grabazioa

GetxoExpress film laburren lehiaketaren bosgarren edizioa urriaren 23tik 25era egingo da. Aurten, zinemaldian parte hartzeko dauden 25 plaza 48 ordu baino gutxiagotan amaitu dira. Gainera, GetxoExpressen programazioa GetxoExpressPRO ekimenarekin osatuko da, hau da, ikus-entzunezkoen profesionalentzako bi egun izango dira, hain zuzen ere, urriaren 21ean eta 22an. Berritasun gisa, programazio osoa ikusi ahal izango da bai aurrez aurre bai streaming bidez, lehiaketaren web orriaren bidez (www.getxoexpress.com). Jarduera guztiak doakoak izango dira.

Lehiaketa urriaren 23an (ostirala) hasiko da, 18:00etan. Bertan parte-hartzaileei edizio honetako gaia emango diete. Une horretatik aurrera, 25 taldeek 42 ordu izango dituzte haien ideiak landu, grabatu eta film laburrak ekoizteko. Filmen proiekzioak eta sarien banaketa ekitaldia urriaren 25ean izango dira, 18:00etatik aurrera, Areetako Andrés Isasi Musika Eskolan, eserleku mugatuekin. Jaialdiak 2.600€ baino gehiago banatuko ditu irabazleen artean.

GetxoExpressPRO

GetxoExpress PRO ekimenean, urriaren 21ean 18:00etan, Inge Sáezek parte hartuko du. LinkedInen aplikatutako marketin-estrategietan aditua da eta ikus-entzunezkoen eta kulturaren sektoreko enpresen eta profesionalen ikusgarritasuna hobetzeko tailerra emango du Linkedin-en bidez. Ondoren, 19:00etan, zenbait film labur proiektatuko dira; proiektu horietako talde batzuk bertan izango dira, eta, gero, Borja Crespok moderatutako mahai-inguru batean entzun ahal izango dira. GetxoExpress PROrekin amaitzeko, urriaren 22an, 11:00etan, Moriarti Produkzioak ekoiztetxeko kideek zine zuzendaritza eta talde-lanaren inguruko masterclass bat eskainiko dute. Lan egiteko moduez eta filmaketetan eta ikus-entzunezko proiektuetan talde-lanak duen garrantziaz arituko dira.

GetxoExpress Pro programaren edozein jardueratan aurrez aurre parte hartzeko, Romo Kultur Etxean, interesdunek hurrengo helbidean eman beharko dute izena: https://getxoexpress.com/gtx-pro  

Epaimahaia eta babesleak

GetxoExpressen epai-mahaikideak honako hauek izango dira: Ramón Barea, aktorea; Iratxe Fresneda, zinema zuzendaria eta Gorka Aguirre, efektu berezietako makilajea. Lehiaketa egin ahal izateko, ezinbesteko laguntzaileak dira Getxoko Udala, Bizkaiko Foru Aldundia, Bizkaia Zubia eta Metro Bilbao.

Informazio gehiago: www.getxoexpress.com, www.facebook.com/getxoexpress, @Getxo_Express, @getxoexpress eta info@getxoexpress.com  

Esta web utiliza cookies, puedes ver nuestra política de cookies, aquí Si continuas navegando estás aceptándola
Política de cookies +