2025/2/27
Udalak proba pilotu bat egingo du hiri hondakin solidoen (HHS) ehun edukiontzi baino gehiagorekin, sutea goiz detektatzeko eta automatikoki itzaltzeko. Helburua da ekintza bandalikoak prebenitzea eta modu eraginkorrean heltzea administrazioarentzat kostu handia dakarren edukiontzietan nahita piztutako suteen problematikari, eta, aldi berean, edozein gertakariren aurrean erantzun azkarra bermatzea.
Horregatik, teknologia berritzailea duen sistema aurreratu bat ezarriko du, funtsezko bi zutabetan oinarritzen dena. Alde batetik, detekzio goiztiarreko sentsoreak instalatuko dira edukiontzietan, suaren presentzia eta tenperaturaren igoera anormala identifikatzeko diseinatuak. Sentsore horiek LoRaWAN sarera konektatuta egongo dira, irismen luzeko eta energia kontsumo txikiko hari gabeko komunikazio sistema bat, alertak denbora errealean bidaltzeko aukera ematen duena. Itelazpirekin egindako akordioari esker, teknologia horrek gailuen konektibitate eraginkorra bermatuko du, eta larrialdi zerbitzuei berehala jarduteko eta kalteak minimizatzeko aukera emango die.
Bestalde, edukiontzien barruan sua automatikoki itzaltzeko gailuak jarriko dira, sua berehala itzaltzeko eta zabaltzea saihesteko. Sentsorika berritzailearen eta erantzun automatikoaren konbinazio horrek, suteen inpaktu ekonomikoa murrizten laguntzeaz gain, disuasio elementu bat ere izango da ekintza bandaliko horiek eragiten saiatzen direnentzat.
“Ekimen honekin, Getxok segurtasunarekin, berrikuntzarekin eta jasangarritasunarekin duen konpromisoa berresten du, teknologiarik aurreratuena erabiliz gure auzotarren segurtasuna hobetzeko eta hiri altzarien babesa bermatzeko. Gobernuak neurri eraginkorren eta berrikuntzan eta baliabide publikoen kudeaketa arduratsuan oinarritutako irtenbide erreal eta kontrastatuen aldeko apustua egiten du”, adierazi du Janire Ocio Azpiegitura, Obra eta Zerbitzuetako zinegotziak.
Probatik bide publikoan inplementatzeko fasera
Sistema berritzaile hori arrakastaz probatu da aste honetan bertan ingurune kontrolatu batean, Larrañazubiko ingurumen-gunean, Babes Zibilarekin, Suhiltzaileekin eta Udaltzaingoarekin lankidetzan, eta oso emaitza positiboak lortu dira. Alde horretatik, Gobernu Irekiko eta Modernizazioko zinegotzi Zaloa Campillok adierazi duenez, “proiektu hau Azpiegituren, Obren eta Zerbitzuen Arloaren eta Gobernu Irekiaren eta Modernizazioaren Arloaren koordinazioaren emaitza da, eta teknologia azpiegituren zerbitzura jartzen den beste adibide bat da”.
Hurrengo urratsa esperientzia hori bide publikora eramatea izango da, udalerriko hainbat gune estrategikotan fase pilotu bat eginez. Prozesu horretan, sistemaren eraginkortasuna ebaluatuko da, eta behar diren doikuntzak egingo dira, eskala handiagoan inplementatu aurretik.