2025/1/29
Bihar, osteguna, urtarrilak 30, hasiko da 2026ko Aurrekontu Parte-hartzaileen lehen fasea, eta, bertan, otsailaren 23ra arte, herritarrek ekarpenak arin, erraz eta argi egin ahal izango dituzte. Lagundu Getxo hobetzen lelopean, Udalak prozesua garatzen jarraituko du, 2017tik kontsolidatua, eta milioi bat euro bideratuko dira horretara.
Herritarren Partaidetzarako zinegotzia Gorka Mostajok esan duenez, “ziur gaude herritarrek badituztela gure udalerria hobetzen edo getxotarren bizi-kalitatea hobetzen lagun dezaketen proposamenak. Udalak prozesu honetan parte hartzera animatzen du, guztion artean Getxo hobea eraiki ahal izateko”.
Otsailaren 5ean, 19:00etan, Benta gunean (Aingeruaren etorbidea 49) informazio-saio bat izango da, prozesua hurbiltzeko eta udal aurrekontuaren kontu garrantzitsu batzuk ezagutarazteko.
Prozedura
16 urtetik gorako eta udalerrian erroldatutako edonork aurkeztu ahal izango ditu bere ekarpenak. Halaber, Udalaren Erakundeen Erregistroan inskribatutako edozein erakundek ere parte hartu ahal izango du, baita, antolamenduaren arabera, Getxon nortasun juridikoa eta egoitza soziala edo establezimendu iraunkorra duen edozein elkartek, sindikatu-fundaziok, enpresa-elkartek, elkargo profesionalek, zuzenbide publikoko korporaziok edo bestelako entitatek ere.
Aurreko urteetan bezala, getxotarrek honelako proposamenak aurkeztu ahal izango dituzte: udal-eskumenekoak; herritar guztien interes orokorrerako direnak; urteko aurrekontu-ekitaldian finantzatu ahal direnak; baliabide tekniko, juridiko, ekonomiko eta giza baliabideei dagokienez bideragarriak direnak; zehatzak, ekonomikoki ebaluagarriak eta ulergarriak direnak; laguntza ekonomikorik, dirulaguntzarik, bekarik, saririk edo langileen kontrataziorik ez dakartenak; beste udal-proiektu batzuen bidez gauzatu ez direnak edo gauzatzen ari ez direnak; egungo esparru juridikoa eta legala errespetatu behar dutenak (ez dute eduki ilegalik izan behar, ez eta difamatzaileak edo diskriminatzaileak izan ere).
Parte hartzeko bideak
Proposamenak egiteko inprimakiak beteta online aurkeztu ahal izango dira, Zeugaz plataformaren bidez -eskatzen diren eremuak erregistratuz eta betez-.
Ekarpena aurrez aurre egin nahi izanez gero, inprimakia paperean bete eta honako lekuetan utzi ahal izango da:
• kutxetan: Algortako (Torrene kalea) eta Areeta-Romoko (Ogoño kalea) Herritarren Arretarako bulegoetan; Fadura eta Gobelako kiroldegietan; eta Algortako (Villamonte) Kultur Etxean, Romo Kultur Etxean eta San Nikolaseko liburutegian.
• informazio-moduluetan: 11:00etatik 14:00etara eta 17:00etatik 20:00etara zabalik egongo dira, hemen:
- Fadurako kiroldegian (sarreran), urtarrilak 30
- Algortako Geltokia plazan, otsailak 6, 7 eta 8
- Bidezabalgo Osasun Zentroaren plazan, otsailak 10, 11 eta 12
- Areetako Geltokia plazan, otsailak 13, 14 eta 15
• postontzietan: Areeta, Algorta eta Bidezabal metro-geltokien inguruan eta Bentan (Andra Marin, autobus-geltokiaren ondoan) egongo dira.
Prozesuan zehar, dinamizatzaileak herrian zehar ibiliko dira herritarrak parte hartzera animatzeko. Txaleko serigrafiatuak eramango dituzte, behar bezala identifikatzeko.
Epe hori amaitutakoan, Udaleko zerbitzu teknikoek herritarrek aurkeztutako proposamenen bideragarritasun teknikoa eta ekonomikoa aztertuko dute. Baldintzak betetzen dituztenak proiektutzat hartuko dira.
Udalak aukeratutako proiektuen behin betiko zerrenda jakinarazi ondoren, bigarren fasean, Getxoko herritarrek lehenetsi egingo dituzte.