2024/10/9
Gailu digitalen erabilera goiztiarraren arriskuei buruz hausnartzeko, sentsibilizatzeko eta kontzientzia hartzeko gunea eskaintzea, bertan izango diren hainbat adituren eta inguruko esperientzien bidez, izango da Adingutxikoak eta osasun digitala jardunaldiaren helburua. Hori Getxoko Udalak antolatu du, Eusko Jaurlaritzaren laguntzarekin, urriaren 26rako, Romo Kultur Etxean.
Familiei eta profesionalei zuzendutako jardunaldiak pantailen eta gailu teknologikoen erabilera masiboaz kontzientziatzen lagundu nahi du, pornografiarekin edo indarkeriarekin lotuta sarean kontsumitzen diren edukiei buruz hausnartzeaz gain. Sare sozialetan bizitza pribatua gehiegi erakusteari buruz ere hitz egingo da, horrek gazteengan segurtasun- eta jazarpen-arazoak, eta osasun psikologikoari eta emozionalari eragiten baitizkie.
Azken batean, Udalak Euskadi osasungarriagoa eraikitzen lagundu nahi du, Eusko Jaurlaritzaren 2030 Osasun Planaren helburua haurrak eta nerabeak jaio, hazi eta helduarora iristea baita, beren osasun-ahalmen guztiarekin. “Horregatik hitzaldi eta esperientzia ezberdinen bidez, teknologiak identitatearen eraketan eta trebetasun sozialetan nola eragiten duen hausnartuko da, mundu digitalaren eta fisikoaren arteko oreka osasuntsua aurkitzen saiatzeko, aro modernoan nerabezaroaren garapen integrala bermatze aldera”, azaldu du prentsaurrekoan Carmen Díaz Gizarte Kohesioko zinegotziak.
Egitaraua
9:30ean ongietorri instituzionalaren ondoren, 9:45etik 11:00etara, Telmo Lazkano irakasleak eta gai hauetan erreferenteak Troiako zaldi berria hitzaldia eskainiko du. 11:00etatik 12:00etara, hainbat esperientzia ezagutuko dira hurrengoen eskuetatik: Mirene Beriain, Ander Deuna ikastolako Altxa Burua taldeko ordezkariak Altxa Burua saretzen. Indarrak batuz!, Sopelako ikastolaren esperientzia azalduko du; Elena Cruzek Azkorri ikastetxearen esperientziaz hitz egingo du eta Carmen Díaz Gizarte Kohesioko zinegotzia Udaleko Prebentzio Zerbitzuaren ibilbideaz.
Atsedenaldiaren ostean, 12:30ean Adikzioa, ziberbullyinga ea pornografiari buruzko mahaingurua izango da. Horretan Iragartze Garairen gaia Nerabeak eta jokabide-adikzioak: mugikorrak, jokoa eta pantailak. Esku-hartzea eta tratamendua genero-ikuspegiarekin izango da; Saioa Magunazelaiarena Ziberbullinga, zer da? Zelan prebenitu?, eta Raúl Marcosena Aro digitaleko pornoa: erotika klik batean. Azkenik, 14:15etik 14:30era ondorioen tarterako izango da.
Solasaldi batzuk gazteleraz izango dira eta beste batzuk euskaraz. Interpretazio-zerbitzua (euskara, keinu hizkuntza) eta beste zerbitzu-osagarriak (haurtzaindegia, desgaitasun egoeran dauden pertsonentzako laguntza…) izango dira, aurretiko izenematearekin.
Jardunaldirako doako izena emateko epea datorren urriaren 22an amaituko da, edukiera mugatua baita; Adingutxikoak eta osasun digitala // Menores y salud digital (google.com).
