2023/2/21
Getxoko Nazioarteko 46. Jazzaldiaren Talde Lehiaketako epaimahaiak lehiaketaren aurreko fasearen aukeraketa egin berri du, eta finalean parte hartuko duten lau bandak aukeratu ditu. Final handia ekainaren 28tik uztailaren 1era izango da Muxikebarri zentroan eta bertan Alemania, Frantzia, Polonia eta Suitzako taldeak arituko dira 21:00etan, saio nagusien aurretik.
Ekainaren 28an Vincent Meissner Trio taldeak irekiko du lehiaketa, Alemaniako eszenako talenturik oparoenetariko bat omen den lider eta pianistaren inguruan eraikitako taldea, hain zuzen ere. Sortu zenetik, hirukoteak hainbat sari jaso ditu bere herrialdean, hala nola German Jazz Union (2019), German Central Jazz Award (2020), Junger Münchner Jazz Preis (2021) eta Biberach Jazzpreis (2022). Beren musikan forma eta erritmo konplexuekin esperimentatzen dute eta Alemaniako jazz-eszena gaztean nabarmentzeko moduko soinu propioa garatu dute.
Hurrengo egunean, hilak 29, osteguna, Victor Carrascosa Quarteten txanda izango da. Suitzan sortutako nazioarteko laukotea da, eta Victor Carrascosa Bartzelonako tronpeta-jotzaile gazteak gidatzen du. 20 urte besterik ez ditu, eta jazz-sustraiek sentsazio berriak bilatzeko bidea ematen duten proposamen bat planteatzen du. Interakzioa, freskotasuna, tradizioa eta abangoardismoa uztartzen dira jazza Ipar Amerikako errepertorioaren standard ezagunetatik abiatuta egiten dituen irakurketa berrietan, konposizio propioak alde batera utzi gabe.
Hirugarren egunean, ekainaren 30ean, Giulio Ottanelli Quartet arituko da, Parisko Kontserbatorio Nazionalean sortutako taldea, saxofoi jotzaile, konpositore eta moldatzaile italiar gazteak gidatuta. Bach eta Ravelen musikaren eta Billy Strayhorn eta Mark Turner bezalako artisten jazzaren eraginez, doinu finetan oinarritutako jazz herrikoia interpretatzen dute, modu kementsuan interpretatzen dutenak.
Azken finalistak, Jarecki Jazz Octet, amaiera emango dio azken faseari, hilaren 1ean. Poloniako interprete gazte talde bat bilduko du proiektu honek, Jan Jarecki piano jotzaile sarituaren inguruan. Musikari eta konpositoreak zortzikote baterako musika idazteko erronkari aurre egiten dio. Zortzikote horrek soinuen amalgama zabala hartzen du, swing-etik hasi eta erritmo afrokubatarretaraino, groove-tik eta Maria Schneider edo Gil Evansen orkestrazio-eraginetatik igaroz, besteak beste.
Sariak
4.300 euro jasoko dituzte lehiaketaren irabazleek eta diskoa grabatuko dute zuzenean Jazzaldian. Bigarren sariari 1.800 euro dagozkio eta, azkenik, bakarlaririk onenak 900 euro eskuratuko ditu. Halaber, finalerako hautatutako lau bandek 1.000 eta 2.000 euro bitarteko laguntzak jasoko dituzte dieta gisa (bidaia egiteko, egile-eskubideak ordaintzeko…) eta egonaldia antolatzaileen kontura izango da. Sariez gain, ohi denez, irabazleek Lovainako (Belgika) B-Jazz eta Eivissa Jazz jaialdietan parte hartuko dute.