2022/5/26
Getxok Eskola Bidea proiektua jarri du martxan, ikasle gazteenek eskolara egiten dituzten joan-etorrietan mugikortasun iraunkor eta segurua sustatzea helburu duen ekimena. Proiektuaren bidez, Getxo umeentzako udalerri atseginagoa izatea lortu nahi da, kaleetatik modu autonomoan, aktiboan eta seguruan mugitu daitezen eta espazio publikoa berreskuratu dezaten, “Getxo udalerri osasuntsuago eta seguruago bilakatuko duen ekimena da, eta ikastetxeen eskaera bati erantzuteaz gain, irakasleen, gurasoen eta ikasleen laguntzarekin emaitza ziurtatuta egongo da eskola-bide horien diagnostiko- eta diseinu-fase honetan”, azpimarratu du Joseba Arregi Ingurumeneko Hiri Zerbitzuetako eta Ingurumeneko Kalitateko zinegotziak.
Ekimena Francesco Tonucci pedagogo italiarraren Haurren Hiria proiektuan oinarritzen da. Hiriak adingabeen ikuspegitik antolatzea helburu duen partaidetza proiektua da, eta bere sortzaileak defendatzen duen bezala, hiria haurrentzako erosoa, segurua eta bizitzeko modukoa izatearen alde lan egiteak gizarte osoari mesede egiten dio.
Eskola Bidea maiatzean jarri da abian, eta ikasturte honen amaieran eta hurrengo ikasturtean zehar garatuko da. Momentuz ekimena hasierako fasean dago eta parte hartuko dutenekin lehen kontaktuak izan dira. Alde batetik, batzorde teknikoa sortu da, udaleko sail desberdinetako ordezkarik osatua dagoena: hezkuntza arloa, ingurumen arloa, azpiegituren, obren eta zerbitzuen arloa, komunikazio arloa eta udaltzaingoa. Euren parte-hartzea ezinbestekoa izango da proiektuaren arrakasta bermatzeko.
Bestalde, udalerriko lehen hezkuntzako 13 ikastetxeekin lehen bilera ospatu da, proiektua aurkezteko helburuarekin. Laster bilerak berriak egingo dira parte hartzen duten ikastetxeetako Ikasleen Guraso Elkarteekin, familiak ere ekimen honekin konprometitu daitezen.