2022/4/22
Getxoko Udalak kanpaina bat jarri du abian edukiontzi marroiaren erabilera sustatzeko eta etxeetako eta jardueretako (merkataritza) hiri-hondakin solidoen materia organikoa jatorrian hobeto hautatzeko. Hori dela eta, ekimen horren garapenaren berri ematen duen gutun bat postontzietan banatzen hasi dira gaur, etxe guztietara fase desberdinetan iristeko asmoz.
Amaia Agirre alkateak azpimarratu duenez, “udalerri jasangarriagoa eta ingurumenarekiko begirunetsuago egiteko ahaleginean, kanpaina honi ekin diogu getxotarrei azaltzeko zein den organikoaren bilketa zerbitzua eta nola atxiki daitezkeen; beren etxeetara eramango zaizkie edukiontziaren erabilera egokia eta jatorrizko bereizketa bermatzeko materiala eta informazioa; edukiontziaren irekierarako behar den txartelari atxikitako pertsonen datuak lotuko ditugu, ondoren jarraipena egin ahal izateko; herritarrei eta komertzioei azalduko diegu banaketaren etekinen; beraz, jatorrizko hautaketaren eta amaieran lortutako produktuaren xehetasunak azalduko ditugu. Herritarrek jakin nahi dute zer lortzen dugun jatorrizko bereizketa horrekin, eta ea haien ahaleginak eta erantzukidetasun-jarduerak merezi duten gure planeta hobetzeko”.
Edukiontzi marroia edo bosgarren edukiontzia, itxiera elektronikoarekin eta irekitzeko hurbiltze-txartela behar duena, 2017an ezarri zen Getxon. Gaur egun, 5.000 pertsonak eman dute alta zerbitzuan, eta kopuru hori handitu behar da estatuko eta Europako legerian ezarritako helburuetara iristeko. “Materia organikoa bereizita, hau da, janari-hondarrak (begetala, haragia eta arraina) biltzearen helburua da birziklapenaren % 50a gainditzea, Europak ezarritako erronka. Hori lortzeko, herritarren eta udalaren arteko konplizitatea behar dugu. Iaztik Foru Aldundiak haragi eta arrain hondakin gordinak eta kozinatuak edukiontzi marroian onartzen ditu eta horregatik zeregina errazago izango da gure etxeetan. Kanpaina bat egingo dugu bereiztearen garrantzia azaltzeko. Etxe bakoitzean eta zortzi informazio gunetan ongietorri-kitak banatuko dira, edukiontzi marroia irekitzeko txartelarekin, zeintzuk diren hondakin organikoak azaltzen dituen magnetikoarekin, ontzi aireztatu batekin eta poltsa konpostagarriekin. Udalerria lau sektoretan banatu dugu, udalerriko 30.000 etxebizitza baino gehiagotara heltzeko eta horretarako profesionalen hiru talde ditugu, sektore bakoitzean hiru astez egoteko.”, adierazi du Joseba Arregi Ingurumeneko Hiri Zerbitzu eta Ingurumen Kalitateko zinegotziak.
Gaur etxe eta saltokietan banatzen hasi den gutunean kanpaina azaltzen da eta biohondakinak gaika biltzeko sistemari atxikitzeko deia egiten da. Halaber, kartelak jarriko dira atarietan, pertsonek izena eman eta kit osoa etxean bertan jaso ahal izateko. Gainera, saltokietara bisita pertsonalizatuak egitea aurreikusten da.
Aldi berean, sentsibilizazio-kanpaina bat egingo da, hainbat informazio-gune ibiltari ezarriz. Puntu horietan, herritarrak artatuko dira, kanpainari eta bio hondakinen gaikako bilketa-sistemari buruzko informazioa emanez, eta etxean materia organikoa modu egokian bereizteko moduari buruzko argibideak emanez. Sisteman alta ematen dutenei bio hondakinentzako kita emango zaie hurrengoekin: aireztatutako kubo marroi bat, edukiontziak zabaltzeko txartel elektronikoa, poltsa konpostagarrien pakete bat, eta bereizi beharreko materialari buruzko informazio-imana eta zerbitzuari buruzko informazio-gida bat.
Informazio-gune ibiltariak Areetako Andrés Larrazabal eta Nagusi kaleen elkargunean maiatzaren 10ean, 12an, 14an, 25ean eta 27an egongo dira; Romoko Santa Eugeniako plazan, maiatzaren 18an, 20ean eta 31n eta ekainaren 2an eta 4an; Algortako Geltokia plazan, maiatzaren 11n, 13an, 24an, 26an eta 28an, eta Ollarretxe eta Salsidu kaleen elkargunean, maiatzaren 17an, 19an eta 21ean eta ekainaren 1ean eta 3an; Negurin, Gernika parkean ekainaren 7an, 9an 11n, 22an eta 24an, eta San Inazio plazan ekainaren 15ean, 17an, 28an eta 30ean eta uztailaren 2an; eta Andra Marin, Malakate parkean, ekainaren 8an, 10ean, 21ean, 23an eta 25ean, eta Borobia parkean, ekainaren 14an, 16an, 18an eta 29an eta uztailaren 1ean.
Ordutegia asteartetik ostiralera 09:00etatik 13:00etara eta 16:00etatik 19:00etara izango da, eta larunbatetan, 10:00etatik 14:00etara eta 16:00etatik 19:00etara.
Zer birziklatu. Poltsa konpostagarriak eta doako konpostak
Edukiontzi marroian, animalia-jatorriko hondarrez gain (haragi, hestebeteak, arrain eta itsaskiak, arrautzak eta horien oskolak, hezurrak eta gazta), kozinatuak edo gordinak, honako hondakin hauek ere bota daitezke: begetalak (fruituen hondar eta hezurrak, ortuariak, lekaleak, barazkiak, pastak eta arrozak, haziak, fruitu lehorrak eta horien oskolak, zerealak), kozinatuak edo gordinak; loreak eta landareak, belarra eta inauste-hondarrak, ogia, gailetak eta opilak, sukaldeko papera, paperezko ezpainzapiak eta mahai-zapiak, kafe-poso eta -iragazkiak, txikoria, infusio-poltsatxoak, kortxo naturaleko tapoiak, kartoizko arrautza-ontziak eta kartoi ondulatu zikina (guztiak materia organikoz bustiak), brotxetetarako edo beste elikagai batzuetarako zotzak, izozki-makilak eta antzekoak, algak, alpistea, gozokiak, irina, marmelada edo poltsa, ontzi eta tresna konpostagarriak.
Gainera, aipatu bezala, organikoa banatzen duten eta edukiontzi marroia erabiltzen duten pertsonak, 17 astean behin, 37 poltsa konpostagarri eta lore eta landareentzako ongarri-ontzi txikiak eskuratu ditzakete dohainik, Algortako Urgull kaleko udal-bulegoetan, Romo Kultur Etxean eta Fadura eta Gobela kiroldegietako hallean jarritako lau makinetan.