Getxoko Udalak, Bizkaiko zenbait udalekin batera (Basauri, Erandio, Gernika-Lumo, Leioa eta Txorierriko Mankomunitatea) KAISHOP! kanpaina martxan jarri dute berriro, euskararen erabilera sustatzeko eta herriko merkataritza bultzatzeko asmoarekin. Alkarbideren (Bizkaiko Euskara Zerbitzuen Bilgunea) eta Bizkaiko Foru Aldundiaren laguntzarekin, aurtengo leloa “Euskara + km0 = kalitatea!” izango da.
Asmoa da tokiko merkataritzak eskaintzen digun tratu pertsonal eta hurbila, kalitatezko produktuak hurbil erosteko aukera eta euskarak tokiko merkataritzan duen garrantzia aitortzea.
KAISHOP! kanpaina urrats bat gehiago da Udala aspalditik merkataritzan eta ostalaritzan euskararen erabilera sustatzeko egiten ari den lanean. Gogoratu ildo horretan, 2018an Euskararen Laguna Saltokien sarea sortu zenetik, 265 establezimendu baino gehiago gehitu direla bertara, herritarrei beren egunerokotasunean euskara erabiltzeko gonbidapena eginez.
Ekimen hau maiatzan zehar garatu da. Kanpainaren irudia Euskararen Laguna Saltokien sareko kide diren sei establezimenduk osatzen dute: Ciclos Olabarrieta, Depilea, Harri Taberna, Mugarri, Kasune fruta-denda eta Suan denda.
Kanpaina osatzeko Kaishop ibiltaria galdera-lehiaketa antolatu da. Kaletik zebilen jendeari galdetu diete Getxori buruz eta Getxoko merkataritzaren inguruan. Galderak erantzutearekin bakarrik, KAISHOP! zozketa orokorrean, eta Getxoko udalak zein merkatari-ostalariek eskaintzen dituzten sarien zozketan sartzen ziren.
Gainera, Getxon erosketak euskaraz egiten dituzten bezeroak saritu nahi ditugu; horregatik, kanpainari atxikitako edozein establezimendutan euskaraz erosiz gero, bezeroak KAISHOP! EKIMENAREN MATERIALA JASOKO DU DOAN, aurten karteritak izan dira.
