2025/10/1
Algortako Hezetasuna auzoak dagoeneko parke berri bat du Arene kalean eta hori ostiralean, urriak 3, 17:00etan, zabalduko dute. Irekiera ekitaldian Amaia Aguirre Getxoko alkatea eta Janire Ocio, Azpiegitura, Obra eta Zerbitzuetako zinegotzia izango dira, besteak beste. Parkeak lau gune bereizi izango ditu, haurrentzako jolasekin eta adin guztietarako kirola egiteko elementuekin.
Gure herritarren gozamenerako eta ongizaterako pentsatutako espazio berri bat da eta auzotarren eskaerei erantzuten die. Izan ere, obra gauzatzeko aurrekontua milioi bat eurotik gorakoa izan da, eta 446.000 euro 2023ko Partaidetzazko Aurrekontuen kargura joan dira, haurrentzako jolas-gunearen estalki handiaren kostua ordaintzeko.
Amaia Aguirre alkateak nabarmendu du “Hezetasuna auzoko parke berri honekin, aurrera egiten jarraitzen dugu irisgarriago, modernoago eta adin guztientzat pentsatutako Getxorantz. Udalerrian 45 haur-parke ditugu, eta hau, Arene parkea, herritarren lankidetzak eta Aurrekontu Parte-hartzaileek bizilagunen eskarietatik sortutako proiektuak nola gauzatzen diren erakusten duen adibidea da. Gure herritarren gozamenerako eta ongizaterako sortutako Arene parke berriak haur jolasak eta adin guztientzako kirola egiteko elementuak biltzen ditu, auzoan dagoen aisialdi eskaintza zabalduz. Gainera, elkartzeko eta elkarbizitzarako gunea izan nahi du. Herritarrak gonbidatzen ditugu bere egitera, zaintzera eta gozatzera, Hezetasuna auzoko egunerokotasunaren parte gisa”.
Parkea ostiralean, 17:00etan, inauguratuko da, agintariek egingo duten zintaren ohiko mozketarekin, ohorezko aurreskuarekin, magia saio batekin eta mokadu txiki batekin.
4 eremu bereiziak
Ekipamendu berriak 1.370 m2-ko azalera du, ondo mugatutako lau gunerekin: horietako bi, estaliak, haurrentzat bakarrik izango dira, eta jolasak izango dituzte, hala nola txirristak, zabuak edo igotzeko egiturak; hirugarren batek kirol anitzeko pista bat hartuko du, eta laugarrenean, kalistenia gune bat eta beste kirol elementu batzuk egongo dira adin guztietarako eta mugikortasun murriztua duten pertsonentzat, beren egoera fisikoaren arabera ariketa desberdinak erraz egin ahal izateko.
-Parkeko 1. zonan kirol anitzeko pista bat egongo da, 22x12 metrokoa, saretarekin itxitako ateekin eta saskiekin. Pistak alboetako sarbide inklusiboak eta belar artifiziala edukiko ditu.
- 2. zonan, 17x14 metroko dimentsioa duena, haurrentzako jolaserako elementuak jarriko dira estalkipean, 2 eta 6 urte bitartekoentzat. Eremu horretan adingabe bat baino gehiago egon ahal izango da aldi berean, eta zoladura indargetzailea izango du. Honako hauek osatuko dute, gutxienez: igotzeko egitura bat, sehaska eserlekua duen kolunpioa, eserleku hirukoitza duen zabua eta oreka, igoera eta txirrista irisgarriko jarduerak egitea bermatzen dituen jolas gunea (estalkiaren barruan zein kanpoaldean).
- 3. zonan, 5 urtetik gorako adingabeentzako hainbat joko-elementua egongo dira. Aurreko eremuaren neurri bera izango du, hau da, 17x14 m, eta gutxienez 2 txirrista, igotzeko guneak eta altuera desberdineko pasarelak izango ditu.
- 4. eremuan, 270 m2-ko azalerarekin, hainbat elementu jarriko dira ariketak egin ahal izateko zintzilikatuta eta laguntzarekin, horietako batzuk mugikortasun urriko pertsonentzat pentsatuak. Era berean, kalistenia eremu bat izango da, muskuluak berotzeko eta indartzeko ariketak egiteko (batez ere gorputzaren pisuaz baliatzen den entrenamendu sistema da, indarra eta gaitasun kardiobaskularra hobetzeko).