2024/5/26
Udalak herritarrei entzuteko prozesuari ekin dio beharrak identifikatzeko eta Algortako San Nikolas kaleko 23 zenbakian dagoen udal eraikinaren erabilera definitzeko proposamenak biltzeko (“Txokerak” ere esaten zaio). Hori dela eta, gonbita egin nahi die Getxoko herritarrei, oro har, eta Portu Zaharreko bizilagunei, bereziki, ekimen honetan parte hartzeko. Izan ere, maiatzetik ekainera bitartean egingo diren topaketen eta dinamiken bidez, parte hartzeko hainbat gune prestatu dira. Prozesuaren fase hau amaitutakoan, Udalak lortutako emaitzak argitaratuko ditu, eraikinaren erabilera zehazteko oinarri gisa balioko dutenak.
Eraikinak ondare-balioa eta -babesa ditu, 125 m2-ko azalera erabilgarria du, eta 100 lagunentzako edukiera, gutxi gorabehera. Eraikinaren osotasun estrukturala eta estetikoa zaintzeaz gain, haren ondare-balioa dela eta, eraikinaren erabilerak auzoko bizilagunekiko bizikidetza errespetatu beharko du, eta zaratarik eta eragozpenik ez sortu. Birgaitze-obren lehen fasea duela gutxi osatu da. Orain, espazioaren erabilera zehazteke dago, obren azken fasea doitzeko eta amaitzeko eta udal-ekipamendu hori egokitzeko.
Nola hartu parte
Ekarpenak biltzeko fase publikoa ekainaren 10etik 20ra egongo da zabalik. Getxon erroldatutako edonork aurkeztu ahal izango ditu, online edo posta elektronikoz, ekipamendua erabiltzeko proposamenak edo ideiak.
Ekainaren 13, 14, 17 eta 18an ate irekien jardunaldiak izango dira, interesa duten pertsonek eraikina gaur egun nola dagoen jakin dezaten. Bisitaldiak irekiak diren arren, edukiera arazoak saihesteko, gomendagarria da izena ematea.
Jasotako proposamenak eta ideiak parte-hartze topaketara eramango dira, ekainaren 22an egingo da Muxikebarrin, 10:00etatik 13:30era. Ekarpen eta ideia horietatik abiatuta, hainbat metodologia eta tresnaren laguntzaz, parte-hartzaileei gonbidapena egingo zaie prototipoak diseina ditzaten ekipamenduaren erabilerak eta beharrak identifikatzeko. Muxikebarriko topaketan parte hartzeko izena eman behar da.
Parte hartzea eta izena ematea online egin ahal izango da, Zeugaz plataformaren bidez edo sannikolas23@getxo.eus posta elektronikoz.
Historia
San Nikolas 23ko eraikinaren jatorria San Nikolas ermita zaharrean dago, eta lehen erreferentzia 1634koa da, Algortako marinelentzat gurtzeko eta elkartzeko leku gisa. Marinelen Kofradiaren egoitza lekuz aldatu eta XIX. mendean San Nikolas eliza berria eraiki zenean, ermita eraberritu eta erabilera berriak hartu zituen. XIX. mendearen amaieran Nautika Eskola bihurtu zen. Ondoren, morfologia aldatzen joan zen, hartu zituen funtzioen arabera, hala nola maisu-etxeak, ziegak, txakurtegiak edo biltegia. Duela gutxi arte, etxebizitzak hartu ditu, eta gune sozial eta elkartzeko gune gisa ere erabili izan da (besteak beste, emakumeen txokoa izan da; hortik datorkio “Txokerak” izena).