Getxo udaleko alderdi politikoen iritziak eta proposamenak

2018ko Ekainak 21

EAJ - PNV

EAJ-PNV

Getxok mendekua ordaintzen du

Alderdi Popularrak Espainiako Gobernutik irtenarazi dutelako egin nahi duen mendekuaren ordaina jasango dugu Getxoko herritarrok. Bai, hala da, Getxo aukeratu du PPk Estatuko egoera politikoaren gainean duen haserrearen ondorioak jasa ditzan; gauzak horrela, 2018. urteko udal-aurrekontua onestea ahalbidetuko zuen eta etorkizuneko Getxo udalerria diseinatzeko oinarri izango ziren irizpideak ezarriko zituen akordioa hausteko aldebakarreko erabakia hartu du.

PPk Getxoko herritarroi azaldu beharko digu zergatik ukatzen digun hainbat proiektu eta jarduketen garapen positiboa, hala nola Areetako Geltoki plazan nahiz Neguriko geltoki zaharreko eraikinean egin beharreko jarduketak eta komun publikoei buruzko programa handia. Alderdi popularrak historikotzat jo zuen aldebakarreko akordioa hautsi du; akordioaren aurkezpenean nabarmendu zen Getxoko egonkortasuna bermatuko zuela, akordioa egon ezean bideraezinak izango liratekeen proiektu estrategikoak desblokeatuko zituela eta gure herritarron beharrizanei erantzungo ziela.

Nolanahi ere, gure konpromisoak mantentzen ditugunok oraindik sinesten ditugun proiektuak dira aipatutako hiru adibideak, hau da, Areetako Geltoki plaza, komun publikoen programa eta Neguriko geltoki zaharraren eskualdaketa. Horrenbestez, Getxoko Euzko Alderdi Jeltzaleko kideok, alderdi sozialistarekin eratzen duen gobernu-taldetik, adierazi nahi dugu mendekuagatik eten diren proiektu horiek eta beste batzuk bultzatu eta etorkizunean garatzeko dauzkagun aukerak aztertzen eta baloratzen ari garela une hauetan.

Getxo udalerriko herritarrok jasango dugu jarrera horren eragina eta gure herriko zerbitzuen mesedetan aurrera egiteko aukeretan islatuko da kaltea; espero dugu jarrera hori puntuala izatea eta akordio zein adostasunen esparruan lan egin ahal izatea berriz, etorkizunean gure ongizatea hobetze aldera.

PP

PP

EAJk zergekin zigortzen ditu motorrak

Udalak udalerriko ibilgailuei aplikatzen dien zerga-zenbaketako sistema guztiz bidegabea da. Auto eta motorrei dagokienez, zergak ez dira modu berean zenbatzen eta ez zaizkie baremo berak aplikatzen: zaldi-potentzia fiskalen arabera baloratzen dira autoak; motorrak, berriz, zilindro-bolumenaren arabera. Horrela, Getxon, auto bat izatea baino garestiagoa da motor bat edukitzea, kontrakoa izan beharko balitz ere. Motorra ekologikoagoa da, bide publikoko espazio gutxiago okupatzen du eta zirkulazioa arintzen du. Hiri-zirkulazioko zergak berrikusteko eskatu nahi dugu; motorrek ordaindu beharreko zirkulazio-zerga merkatuz, horien erabilera bultzatzeko xedearekin.

GUK Getxo

Getxo kutsatua

360.000 m3-ko ur beltz eta hondakin-ur isuri dira gure itsasadarrera, eta horrek azken hamarkadetan gure uretan, kostaldean eta hondartzetan egon den kutsadura-arazorik larriena eragin du. Erakundeek eta medikuek ez zuten osasun publikoarentzat arrisku nabarmena eragiten duen egoeraren berri eman hainbat egun igaro arte. Hondartzetako sorosleei esker lortu da egun eskuragarri dagoen informazio bakarra.
GUK Getxok egoera salatu du eta azalpenak eskatu ditu. Partzuergoak, isurien berri izan ondoren, komunikabideetan adierazi zuen saneamendu-sareak gainezka egin zuela hainbat tokitan ekaitzen ondorioz, baina hori ez da egia.

Ur Partzuergoaren isuriei buruzko txostenak aztertu ostean, ez dago inolako zalantzarik: euria egin eta hainbat egun igaro ostean gertatu ziren isuriak, 8 egun igarotzeraino. Egiaztatzeko erraza izan da hori, isurien egunak eta orduak Eusko Jaurlaritzaren data horien txosten meteorologikoekin alderatuz. Egia ezkutatzen ari dira? Erantzukizunak saihesten ari dira? Getxo eta Bizkaia osoko herritarrok esfortzuak egin ditugu hainbat hamarkadatan gure urak garbitu nahiz berreskuratzeko, eta arazo horiek guztion artean konpondu behar ditugu. GUK Getxoko kideok gure saneamendu-sareak egokitzeko eta ur zikinak eta euri-urak ahalik eta gehien bereizteko lanarekin jarraitzearen alde gaude, baina arazoa konpontzeko lehen urratsa benetan zer gertatu den jakitea da. Harremanetarako: guk@getxo.eus / 94.466.02.90 

EH Bildu

Gardentasunaren eta herri partaidetzaren alde

Ez-ohiko udalbatza egiteko eskaera formala egin dugu udal-gobernuaren aurrekontu proiektua plenoan eztabaidatu eta bozkatu dadin.
Imanol Landa alkateak aurreikusita zegoen ez-ohiko udalbatza bertan behera utzi zuen PPk beraiekin lortutako akordioa hautsi egiten zuela iragarri zuenean. Hala, azken asteetako gertakarien ondorioz herritarrei berriz ere ukatu egin zaie berebiziko garrantzia duen kontu publikoen gaineko informazioa eta eztabaida, eta oposizioko alderdi politikook ezin izan ditugu defendatu 2018ko aurrekontuen inguruan landuta genituen proposamenak.

EAJ eta PP dira egoera honen erantzule zuzenak. Izan ere, eskuineko alderdi biek haien interes politikoak getxoztarren beharrizanen gainetik jarri dituzte gure udalerriko ongizatea Madrilen gertatzen ari zenaren menpe utziz.

Amaitzeko, EAJren joko bikoitza salatu beharrean gaude; udal kontuen eztabaida ukatzen digute batetik, eta komunikabideetan iragartzen dute bestetik 2019ko aurrekontu parte-hartzaileen lehenengo faseari ekingo zaiola. Ez al dute ezagutzen koherentziaren esanahia? Ezin da herri partaidetzaz hitzegin ondoren akordio politiko bat erdietsi ezean aurrekontu proiektua ez denean udalbatzan aurkezten hura eztabaidatu eta bozkatzeko. Guretzat herri partaidetza eta gardentasuna ezinbestekoak dira, eta horregatik lanean jarraituko dugu udal gobernua horiek praktikan jartzera behartzeko. 94.466.02.80  / Mail:ehbildu@getxo.eus / Web orria: http://getxo.ehbildu.eus/   / Twitter: @GetxokoEHBildu / Facebook: https://www.facebook.com/Getxoko.EHBildu/ /  

PSE-EE / PSOE

Ikasturte-amaiera

Ikasturte-amaiera eta uda-hasiera datoz. Horrenbestez, Getxoko Udaleko talde politiko bakoitzak egindako lana ebaluatzeko une aproposa dela deritzogu. Alderdi sozialista bere gobernu-taldearekin batera aritu da lanean udaleko indar politikoekin herritarron egunerokotasuna hobetuko duten akordioak lortze aldera; hala, besteak beste honako hauek izan ditu xede: gizarte-kohesioa, diru-laguntzak hainbat elkarteri, Getxo udalerriko gazteei zuzendutako etxebizitzetarako laguntzak, eskola-materiala erosteko diru-laguntzak, etab.

Akordioak lortu dira kasu batzuetan; beste batzuetan, aldiz, ez. Haserrealdiak eta amorru-uneak ere egon dira; alabaina, orokorrean gehienon erantzukizuna eta konpromisoa izan dira nagusi une oro. Hala eta guztiz ere, esan beharra dago salbuespen bakarra eta nabaria egon dela: alderdi popularrarena, hain zuzen ere. PP alderdiak akordio bat adostu eta sinatu zuen tokiko gobernuarekin, jendeari aurkeztu geniona eta historikotzat jo zena. Hainbat egun igaro ostean eta udalaz kanpoko arrazoiengatik, atzera bota ziren eta iraina arrazoi gisa erabili zuten horretarako. Zer espero daiteke horrelako alderdi batez? Gertatutakoa kontuan izango dugu.

Cs

Beldurra eztabaidari

Estatuan dagoen egoera politikoaren oihartzunen ondorioz, gobernu-taldeak eta PPk egindako aurrekontu-hitzarmena hautsiko denaren albistea jaso berri du Getxok; hori dela eta, udal-aurrekontuen ezohiko osoko bilkura baliogabetu zen. Gure inguruko jendea aintzat hartuta, ekaitz politiko hau konpontzeko erakusten ari den maila politiko eskasak tristatzen gaitu; izan ere, uste dugu kontuen proiektua osoko bilkuran azter dezaten aurkezteko beldurrik ez daukan tokiko gobernua izan behar duela Getxok, eta, horrez gain, getxoztarrak ez liratekeela aurrekontu-eztaibaidatik kanpo geratu beharko.

Hemeroteka

Esta web utiliza cookies, puedes ver nuestra política de cookies, aquí Si continuas navegando estás aceptándola
Política de cookies +